Ræktun

Einn af kostum Orfeus™ próteinframleiðslukerfis ORF Líftækni, er mikill sveigjanleiki í skala framleiðslunnar. Það hentar til framleiðslu á hágæðavöru á litlu magni en einnig til iðnaðarframleiðslu á stórum skala.

Í Grænu smiðjunni í Grindavík, hátæknigróðurhúsi ORF Líftækni, fer fram fyrsta ræktun á öllu nýju byggi fyrirtækisins og öll ræktun á byggi sem myndar mjög verðmæt prótein sem ekki þarf að framleiða í miklu magni. Þar er t.d. ræktað allt það bygg sem framleiðir ISOkine™ vaxtarþætti fyrirtækisins fyrir margvíslegar læknisfræðilegar rannsóknir. Byggið er ræktað í vatnsrækt í skilgreindri næringarefnalausn, á færiböndum og öllum aðstæðum við ræktunina er stýrt nákvæmlega.

Fyrir prótein sem framleiða þarf í meira magni er byggið ræktað í hefðbundari gróðurhúsum,  m.a. á Kleppjárnsreykjum. Fyrir framleiðslu á iðnaðarskala stefnir ORF Líftækni að því að byggja upp hér á landi umfangsmikla akuryrkju á erfðabreyttu byggi til framleiðslu á verðmætum próteinum til útflutnings, í samvinnu við íslenska bændur og fleiri aðila. Núverandi akuryrkja fyrirtækisins fer fram í Gunnarsholti á Rangárvöllum.