Akuryrkja

Kostir Orfeus™ framleiðslukerfisins eru ótvíræðir þegar framleiða þarf mikið magn sérvirkra próteina. Í þeim tilgangi stefnir ORF Líftækni að því að byggja upp á Íslandi umfangsmikla akuryrkju og úrvinnsluiðnað í samvinnu við íslenska byggbændur og fleiri aðila.

ORF Líftækni ræktar erfðabreytt bygg á akri í Gunnarsholti á Rangárvöllum, samkvæmt leyfi sem Umhverfisstofnun veitti árið 2009 og gildir til ársins 2013. Tilraunir með slíka ræktun hafa átt sér stað í samvinnu við Landbúnaðarháskóla Íslands frá árinu 2003.

Ein af ástæðunum fyrir því að bygg varð fyrir valinu sem framleiðslujurt ORF Líftækni er líffræðileg einangrun byggs hér á landi. Yfir þúsunda ára reynsla er af því að bygg vex ekki villt á Íslandi og hér vaxa engar jurtir sem bygg getur blandast við. Niðurstöður tilrauna sýna að byggfræ dreifist lítið frá akri, jafnvel í aftakaveðri. Sjálffrjóvgun er bygginu eðlislæg, þ.e. það frjóvgast af sínu eigin frjódufti og með því sker það sig úr flestum öðrum plöntum sem nota frekar víxlfrjóvgun og dreifa frjódufti sínu til annarra plantna sömu tegundar. Einhverjar viðamestu tilraunir sem gerðar hafa verið á víxlfrjóvgun byggs í heiminum voru gerðar á vegum á vegum Landbúnaðarháskóla Íslands 2002-2006. Í ályktunum vísindamanna Landbúnaðarháskólans út frá niðurstöðum þessara rannsókna kemur fram að ræktun á erfðabreyttu byggi sé algjörlega örugg á Íslandi sé viðeigandi áhættustýringu beitt við ræktunina.

Í Orfeus™ framleiðslukerfi ORF Líftækni er uppsöfnun viðkomandi sérvirks próteins bundin við þroskun fræsins og það er ekki myndað í öðrum hlutum plöntunnar. Þessi prótein eru í öllu kjöti og sumir hverjir í mjólk. Þau eru mjög viðkvæm í framleiðslu og brotna auðveldlega niður eftir myndun í byggfræinu, sé það ekki meðhöndlað sérstaklega. ORF Líftækni framleiðir ekki matvæli eða fóður, en í meltingarvegi manna og dýra væru sérvirku próteinin brotin niður eins og öll önnur prótein.

Með þeim skilyrðum sem ORF fylgir í ræktun á erfðabreyttu byggi, m.a. hvað varðar fjarlægð frá annarri byggræktun, umgengni við akur og uppskeru er framleiðslukerfi fyrirtækisins líffræðilega og vistfræðilega einangrað hér á landi. Þessi afmörkun gefur ORF gott forskot í samkeppni við önnur fyrirtæki sem stunda akuryrkju fyrir framleiðslu á sérvirkum próteinum, enda hefur nálgun ORF í sameindaræktun á akri hlotið hrós erlendra reglugerðaryfirvalda fyrir heildstæða lausn og áherslu á afmörkun og öryggi.

Örugg ræktun áerfðabreyttu byggi – Grein eftir Björn Örvar og Einar Mäntylä í Fréttablaðinu24. ágúst 2010

www.althingi.is/lagas/137/1996018.html

www.althingi.is/altext/stjt/2010.083.html

www.reglugerd.is/interpro/dkm/WebGuard.nsf/b7fd33650490f8cf00256a07003476bb/521ebb291fc0091c00256a08003264db?OpenDocument

www.ust.is/media/fraedsluefni/pdf-skjol/Orf_Liftaekni.pdf