Orfeus™ kerfið

Orfeus™ er einkaleyfisbundið og öruggt kerfi sem vísindamenn ORF Líftækni hafa þróað til að framleiða sérvirk prótein fyrir læknisrannsóknir, lyf og iðnað í erfðabreyttu byggi.

Sérvirk prótein eru prótein með sérhæfða líffræðilega virkni. Orfeus™ kerfið byggir á því að nýta fræ byggplöntunnar sem smiðju fyrir sérvirk prótein. Slík prótein eru flókin að byggingu og þau er einungis hægt að framleiða í lifandi frumum. Fram til þessa hafa slík prótein fyrst og fremst verið framleidd í erfðabreyttum E.coli bakteríum, gersveppum og spendýrafrumum, en framleiðsla í slíkum kerfum er afar kostnaðarsöm og erfitt er að auka framleiðslugetu þeirra að ráði. Auk þess getur notkun afurða úr slíkum kerfum valdið ýmsum vandamálum, t.d. vegna mögulegra smitefna.

Orfeus™ kerfið er afrakstur öflugs vísinda- og þróunarstarfs undanfarin ár, en með því er hægt að lækka verulega framleiðslukostnað þessara próteina og auka gæði þeirra. Sveigjanleiki Orfeus™ kerfisins gerir ORF Líftækni kleift að mæta þörfum mismunandi markaða og óskum viðskiptavina.

Tæknin sem Orfeus™ kerfið byggir á felst í því að smíðað er nýtt bygggen sem hefur að geyma upplýsingar um hvernig mynda eigi ákveðið prótein sem áhugi er á að framleiða. Þessu geni er komið fyrir í byggi á þann hátt að aðeins er kveikt á því við fræþroskun og próteinið er því aðeins myndað í fræjum. Við þetta verður til nýtt yrki af bygginu sem er eins að öllu leyti og annað bygg nema að það framleiðir þetta ákveðna prótein í fræjum sínum. Eftir uppskeru eru sérvirku próteinin fínhreinsuð úr fræjunum með nýjustu tækni og gæðaprófanir gerðar áður en að sölu kemur.

Orfeus™:

• Afkastamikið og öruggt framleiðslukerfi
• Uppskölun er einföld og hagkvæm
• Hreinar afurðir úr hreinni náttúru
• Afurðirnar eru öruggar og innihalda engin smitefni úr dýraríkinu
• Geymsla próteinanna er einföld og ódýr í þurrkuðu fræi
• Sveigjanleiki í  magni (µg-mg-g-kg)
• Rétt myndbygging próteina tryggð með fullkomnu próteinframleiðslukerfi heilkjarna lífveru