Öryggi og gæði

Í Orfeus™ kerfinu eru sérvirk prótein framleidd í erfðabreyttu byggi. Bygg hefur verið ræktað til manneldis um aldir, það inniheldur ekki skaðleg efni og er viðurkennt  í matvæla- og snyrtivöruiðnaði sem örugg planta. Í hefðbundinni framleiðslu á sérvirkum próteinum í dag eru erfðabreyttar bakteríur, gersveppir eða dýrafrumur notaðar sem verksmiðjur, en það getur skapað ýmis vandamál er varða öryggi og hreinleika afurðanna. Þessi vandamál eru ekki til staðar í Orfeus™ kerfinu.

Þau prótein sem framleidd eru í Orfeus™ kerfinu eru aðeins mynduð í fræhvítu byggsins. Fræhvítan er efnafræðilega mjög einfalt og stöðugt umhverfi . Þar er ekki að finna nein eiturefni eða smitefni úr dýrum og þar er lítið af ensímum sem brjóta niður prótein. Í raun er fræhvítan frá náttúrunnar hendi sérhannaður, öruggur og hreinn geymslustaður fyrir prótein. Uppsöfnun próteina í fræinu tryggir því gæði og endingu viðkvæmra og erfiðra próteina. Rétt myndbygging próteina sem framleidd eru í kerfinu er tryggð þar sem byggið býr yfir fullkomnu próteinframleiðslukerfi heilkjarna lífveru.