Um Orfeus™ kerfið

Orfeus™ kerfið byggir á því að nýta fræ byggplöntunnar sem smiðju fyrir sérvirk prótein. Með aðstoð nýrrar þekkingar í erfðatækni er plöntunum gefin „erfðafyrirmæli“ um að framleiða þau í  fræjum sínum. Þessi erfðafyrirmæli eru í raun nákvæmlega smíðaðar erfðaupplýsingar í stórri DNA sameind sem flutt er yfir í byggið í hvert sinn sem framleiða þarf nýtt, sérvirkt prótein. Eftir flutninginn verður til nýtt yrki af bygginu sem er eins að öllu leyti og annað bygg nema að það getur kerfisbundið framleitt þetta sérvirka prótein í fræjum sínum. Eftir uppskeru eru sérvirku próteinin fínhreinsuð úr fræjunum með nýjustu tækni og gæðaprófanir gerðar áður en að sölu kemur.

Orfeus™ kerfið er afrakstur öflugs tækniþróunarstarfs innan fyrirtækins undanfarin ár, þar sem nýjustu tækni og vísindaþekkingu er beitt til að ná þessum árangri.

Nánar um kerfið:

• Öryggi afurðanna er einstakt – engin smitefni, hrein afurð úr hreinni náttúru.
• Rétt myndbygging próteina tryggð með fullkomnu próteinframleiðslukerfi heilkjarna lífveru.
• Uppsöfnun próteina í fræinu, dvalarstigi plöntunnar, tryggir gæði og endingu viðkvæmra og erfiðra próteina.
• Arfhreinar framleiðsluplöntur sem uppfylla ströngustu gæðakröfur nútíma framleiðsluhátta.
• Sveigjanleiki í  magni (µg-mg-gr-kg).
• Uppskölun er einföld og hagkvæm.
• Geymsla próteinanna er í góðum höndum náttúrunnar; fræ varðveita prótein fram að spírun, jafnvel árum saman. Náttúran bjó til bestu lausnina og við njótum góðs af því.
• Geymsla  próteinanna í fræjum gerir okkur kleift að aðskilja framleiðslu og úrvinnslu – próteinin eru hreinsuð úr fræjunum eftir þörfum og eftirspurn.
• Afkastamikið framleiðslukerfi sem byggir á grænni orku, ljósorku og jarðhita (gróðurhús).
• Kerfið hefur sannað sig við framleiðslu ólíkra próteingerða af öllum stærðum og gerðum svo sem ensíma, vaxtarþátta og umritunarþátta.